English

Tenglar
> Heim > NBD á Íslandi > Aðilar > Ráðstefnur  > Stjórn
Saga NBD á Íslandi

Norræni byggingardagurinn á Íslandi á bakgrunn í ráðstefnum arkitekta á Noðurlöndum allt frá síðustu aldamótum. Í tímariti iðnaðarmanna árið 1927 segir Guðmundur H. Þorláksson frá ráðstefnu í Stokkhólmi sem Svíar kalla Nordisk Bygnadsdag. Fara hér á eftir nokkrir kaflar úr grein hans:

 

"Ráðstefna þessi er þannig tilkomin, að síðastliðin 30 ár hafa norrænir byggingarmeistarar (Arkitektar) árlega haldið fund með sjer, til að auka viðkynningu, ræða ýms mál er snertir stjettina, skoða og læra hver af öðrum.

Fundir þessir hafa verið haldnir í norrænu löndunum á víxl.

Á síðasta fundinum í Helsingfors í Finnlandi 1926 komu þeir sjer saman um, að fundir þessir þyrftu að ná til allra Iðnaðarmanna í byggingarfaginu, svo þeir einnig fengju tækifæri til að kynnast og læra hver af öðrum, og var samþykkt að halda almenna norræna ráðstefnu og sýningu í Stokkhólmi 1927.

Formaður og frumkvöðull ráðstefnunnar var prófessor Ragnar Östberg sá er bygt hefur ráðhúsið í Stokkhólmi og talinn er einhver þektasti byggingarmeistari Norðurálfunnar".

 

"Ráðstefnan hófst fimtudaginn 9. júní í sönghöllinni, að viðstöddum konungi Svía og forsætisráðherra, ennfremur sendiherrum Norðmanna, Dana og Finnlendinga. Á ráðstefnunni voru mættir 688 Svíar, 98 Norðmenn, 58 Danir, 117 Finnlendingar og 2 Íslendingar. 38 fyrirlestrar voru haldnir, þar af hjeldu Svíar 18, Norðmenn 9, Danir 7 og Finnlendingar 4. Fyrirlestrar þessir voru um ýmisleg byggingarmálefni og verður ef til vill eitthvað af þeim birt síðar í Tímaritinu".

 

"Iðnsýningar voru 4 um þetta leiti í Stokkhólmi og var þar margt nýtt og merkilegt að sjá. Meðal annars var þar heimilisiðnaðarsýning frá öllum Norðurlöndum - Íslandi einnig. Íslenska sýningin var auðvitað minst fyrirferðar, en það sem þar var sýnt var sýnendum áreiðanlega til sóma".

 

"Okkur Íslendingum var prýðilega tekið hvar sem við komum. Mikinn sóma sýndu Svíar okkur með því að draga fána á stöng við hliðina á Norðurlanda-fánunum hinum og með því að bjóða okkur sjerstaklega í veislu er þátttakendur hjeldu sameiginlega á stærsta veitingahúsinu í Stokkhólmi".

 

"Samþykkt var að halda samskonar ráðstefnu og sýningar á 5 ára fresti í löndunum á víxl og verður næsta ráðstefna haldin í Finnlandi 1932. En 1952 komum við til Íslands, sagði prófessor R. Östberg, og hann er nú sextugur að aldri".
Reykjavik 1968 NBD 10

Reykjavík 2005

NBD 25

Á ráðstefnu í Osló 1938 gengu Íslendingar síðan formlega inn í Norræna byggingardaginn. Þannig að á þessu ári eru íslensku samtökin 67 ára. Þessar ráðstefnur voru fyrst haldnar á fjögurra ára fresti til skiptis á hinum Norðurlöndunum en eftir 1965 á þriggja ára fresti.

 

Fyrsta ráðstefnan á Íslandi var haldin í Reykjavík árið 1968 og bar yfirskriftina "Boligform". Ráðstefnugestir voru um 900 og ráðstefnan sú fjölmennasta sem þá hafði verið haldin hérlendis.

 

Næst var Norræni byggingardagurinn haldinn í Reykjavík 1983 undir yfirskriftinni "Mætted boligmarked?" Ráðstefnugestir urðu rúmlega 1000 og ráðstefnan aftur sú fjölmennasta sem haldin hafði verið fram að þeim tíma.

 

Fara enn fræðgarsögur af þessum ráðstefnum 1968 og 1983 um Norðurlönd og hér heima.

 

Þá var næst haldin ráðstefna á Íslandi haustið 1999, NDB 20, þar sem “kíkt var undir pilsfald nýrrar aldar”. Gestir ráðstefnunnar voru 330. Þema ráðstefnunnar var Norðurlönd/heimurinn 2000 – byggingarlist og náttúran – náttúran og tæknin.

 

Síðasta stóra ráðstefnan sem haldin var í Reykjavík var haldin í Reykjavík dagana 18.-20. september á Nordica Hótel en boðið var upp á "Pre-Tour" á Akureyri 17.-18. september.  Gestir ráðstefnunnar, sem voru um 170, voru ánægðir og þakklátir NBD á Íslandi fyrir góða ráðstefnu, áhugaverða fyrirlestra og enn áhugaverðari kynnisferðir.

Næsta stóra ráðstefnan sem ráðgerð er á Íslandi verður árið 2015 en það verður - NBD 30.